Dil mein ik chubhan si hai,tum kaheen se aa jaao
Har taraf agan si hai,tum kaheen se aa jaao
Gam ki bheegi raaton mein apna dil nahin lagta
Aankh mein pawan si hai,tum kaheen se aa jaao
Ab khuli fiza mein bhi saans lena mushkil hai
Ab ajab ghhutan si hai,tum kaheen se aa jaao
Har khayal-o-khawab par murdani si chhaayi hai
Rooh par shikan si hai,tum kaheen se aa jaao
Hijr k andheron mein intezaar hai tera
Dil mein ik kiran si hai,tum kaheen se aa jaao
Shaam-E-Wasl k ghunghru naachtay hain sochon mein
Phir wohi chhanan si hai,tum kaheen se aa jaao
Kya kahun is ishq mein mujh pe kiya guzarti hai?
Tann mein ik dukhan si hai,tum kaheen se aa jaao
Baagh-O-Gul bhi gair hain,dasht bhi paraaye hain
Zeest bay watan si hai,tum kaheen se aa jaao
Janay kitni raaton se muztarib sa hoon Sam
Janay kya lagan si hai,tum kaheen se aa jaao....!!!
-------------------------------------------
Gazals, Hindi Poetry, Urdu Poetry, Shayari,
-------------------------------------------
